夏日香水

留香法則：

1.點揀：試香水時要分段來聞，因為香水分初調、中調和尾調，香料按不同香料性質分段散發出來，初段以果香居多，約 5-10分鐘先可以聞到香水的基本香味。

2.點噴：視乎約會時間而決定使用香水類型。 玩通宵：可揀 perfume（香精），精油含量最濃縮， 2-3滴，可以香足 12個鐘。 食晚飯：吃喝玩樂幾個小時， EDP（香水）會較適合，香味可維持 6小時。 短聚：下午茶小聚， keep到 2-3個鐘的 EDT（淡香水）就最適合不過。

3.噴邊度：噴於手腕、頸，香味最易揮發；噴耳背、胸前、肩膀，香味慢慢滲出來，最性感神秘；噴髮尾、裙襬，香氛隨風飄逸，容易令人留下深刻印象。

想揀中性味道的香水，帶花香的氣味會較易被女士接受，例如廣藿香加茉莉花呢類組合會比較清新，亦要留意一開始不要用濃香水（ EDP），尤其是夏天，因為中性香味較難 handle，太濃反而會嚇怕人，揀香油成份和酒精純度低一點的（ EDT）會較穩陣。

水果香氣討好又有令人垂涎欲滴的效果，最適合悶熱的夏天用來解暑。荔枝、蜜桃、西柚味都是今年的大熱，甜得來好有活力。

夏天易出汗，大汗的人建議先用淡味止汗劑，然後才於手腕、脈門、頸項等位置離遠約一呎輕噴，如果用 EDT，約 3-4小時再補噴一次，補噴前用濕紙巾抹走之前殘餘及已混和汗水的餘香，這樣香水氣味就會更清新。